Despois de estudar nos seminarios de Castroverde de Campos (Zamora) e de Herbón (A Coruña), licenciouse en teoloxía bíblica en Xerusalén e en Santas Escrituras en Roma. Ordenouse como franciscano en 1971 e profesou solemnemente na orde en 1976. Ao ano seguinte foi ordenado crego polo papa Paulo VI en Roma. Participou na tradución da Biblia ao galego traballando no Libro das Crónicas. En 2003 foi elixido ministro xeral da orde (o seu cargo máis elevado), co que se converteu no 119º frade en facelo dentro da orde dos frades menores (OFM).

Continuou no seu cargo ata que en 2013 o papa Francisco noméao arcebispo de Belcastro, unha pequena aldea da Calabria, cargo simbólico que acompaña á dignidade arcebispal. Ao mesmo tempo o papa designouno secretario da Congregación para os Institutos de Vida Consagrada e as Sociedades de Vida Apostólica, que vén sendo o equivalente a un ministro do goberno vaticano coa responsabilidade sobre a organización interna das ordes relixiosas e dos grupos de leigos.